Svi znote če je sir. Ono če se ji za jutronju ili za obidon ili če bi rekla Francika za ponudit kad ti ne doj Bože nikor dojde, ili po večeri fetica za očistit zube.
Siri van imo majko vrsti, od gude, ementalera, parmezana, friškega, mekega, polutvrdega , tvrdega, još tvrdijega za strgat. Imote talijonskega, livanjskega, poškega i če jo znon kojega još.
Jo van želin provjat o jedinen proven siru, siru koji je moj tata voli i o njemu uvik provjo. Sir od naše oce. Prosušen. Sa jednon feticon možeš puno kruha izist, guštat i najist se, a imoš za čin i zalit. Broški sir.
Pri je svak siri. U nevoji se sve izilo ali malo je komu sir uspivo. Broške su se žene mučile, patile i potile okolo špahera na drva, sirile, škutile, punile lupce, stavijale pize, minjale krpe, sušile. Ni bilo pašabrodi. Procidivalo se mliko kroz brnistru. Bilo je malo i mlika po se je mliko zajimolo. Svaki don bi sirila drugo. Gotov sir se stavijo u kamenicu, toćo u uje.
A onda, kal je bila prigoda, čisti se od murge i pomalo dilo. Kako se ono topi u justa, veće puti užešćen. Molo fetica sira pratila se sa velin kuson kruha, pešnje su se oblanćovale, sa žmulun crnega se zalivalo. Bila je glod i nevoja. Govorili su stori judi: „ne pito zima če smokva gnjila“. Svak bi provjo kako je dobar. Ma ni uvik bi dobar, niti je u svakoga bi dobar.
Danas je drugo vrime. Izumili niku kulturu, moderno sirišća, provine. Sir u svakoga dobar, ne možeš poznat čihov je.
Moga tate već nimo za stolon.
Bi san mu obećo da ću jo provat usirit barenko jednu gomoju. Ni mi baš povirovo, moha je rukun: “somo ti drž govore“. A jo skupi kuraja, veliko voja i žeja da ispunin zovit. Sal ćete vi vidit. Kal može svako pizda sirit mogu i jo.
U sebi san se bojo somo jelne stvori. Čo ako se osramotin i ne uspijen pomust oce. Hoćedu mi to prišit u tastamentu na krnevola.
Poče san se bokun po bokun okolo svitovot kako se muze. Trefin ti jo Ivicu.
„Je teško pomust?“
„Ma brate, koji je to problem!? Jo ti poznajen svaku svoju ocu. Ćapon ti je za zolnju nogu, Zlatica mi je drži, jo čučnen, par puti je pošćukon i onda drugu, na, to ti je čas posla.“
Mučin a ne mogu ol pensira. Njemu je Zlatica drži. E, ali jo nimon Zlaticu.
U pamet mi dojde Tomin patent. Tome Kosić. Ti je čovik bi čudo. Dokozo je da se može bit inžiner bez završit pušku skulu. Pri puno godišć on ti je u štalu napravi prigradu za must oce a sa pet šest paši špoga napravi spoj do Dragomira ponistre da mu hlapurun do sinjol kal tribo oce naginjot.
Iša ti jo do Jurice. Vidin ti jo, on oce isprid sebe put štale, zatvori vrota, se na bančić, a oca jedna po jedna namišćodu se isprid njega ka dimnje. Kako jelnu pomuze, potegne jedon konopčić, isprid nje se otvoridu vrota, ona paso naprid, vrota se zatvoru, namisti mu se drugo. Ma baš pizdarija. Neš ti posla. Piton ti jo njega kako muze, koji su moti? Onda on poče. Mario ti muze sa dvo prsta, nikor ovako, nikor onako, možeš onako,možeš ovako. Ajme meni. Život me nauči da je nojgore kad se može i ovako i onako. Če ću sad? Vrotin ti se ti jo do Ivice. On mi je reka kako to ni problem.
„ Biš ti meni pokozo kako se muze?“
„Al ti to ne znoš?“ Opet ajme meni.
„Ala ti parićoj oce, po mi se jov.“
Cili san srićan. Odvoji ti jo jonce koje se može zaklat, zatvori hi doma u štalu da dočekodu bikora proznih črivih. On će doć prid noć po će popipot ocu po ocu. Koja je nabrizgola toj je odvojen janjac.
Tu noć nison staka učini. Kako zaklopin oči tako vidin Ivicu di muze a onda sebe kako nosin u sić mliko put doma. Da ne bi priskoči, Dragomir mi ponudi njegovu štalu da u njoj muzen. Štala velo, suha, sa prigradon. Imala je i ponaru u kojoj se moga stavit sićic ili šterika ili če već potriba.
Kako san o muženju odovna već sni, brzo san se parićo. Dobro Zlatica me naputila: „ tribuje ti jedon moli sićic u kojega ćeš must i jedon sić od 18 litor u kojega ćeš ulivat mliko.“
Onda se spomenen Tominega patenta. Napravin ti jo od dasok jednu kašetu di mogu turnut ocu da nu somo zodnje noge ostanu vonka a ako su zodnje noge onda je bome i vime. A isprid, isprid vrota u okviru da hi mogu kad hoću podignut uzbrdo da bi ovca mogla izoć.
Doni jo pri rečeni sićic i veli sić i jedon sić sa vodon za oprat ruke i jednu konavacu za ruke istrit. Zatvori san oce u štalu i čekon ti jo Ivicu. Svaku malo san gledo na leroj. On po običoju, ni priša. Ne smin se grintat, “ koga je molit ni ga srdit“. Ali imo i ona „ko čeko ti i dočeko“. Doša je i tin momenat. Evo ti njega. „Če, još nisi pomuza?“
„A kako ću jo bez tebe, ne znon.“
„ Da ne zno? Če ti je brate, koji je to problem?“
U sekund ćapo ti on jednu ocu, ćapo je za vime, popipo. „Stav je na bondu, ova je“. Po tako drugu, po treću. Za nike ni on ni bi sigur jesu posisone ili nisu pod mlikun dobre. Bilo hi je veće tako, majko hi je bilo na rišć, ali ni čo čeko.
Odvojili ti mi muzice na bondu. Sal je moja borba. Ćapo ti on jednu muzicu.
„Doj sić!“
Čučne ti on, sićic pod ocu. Zobi san van reć, jo san je držo za vrot. Sa dvi ruke, šćukni livu, šćukni desnu, meni se učinilo da san somo trepnu. „Evo ti sićic. Isprozni ga!“ „ Čo? Već?“ Ne mogu se načudit, gotova jelna po drugo.
„Evo vako. Možeš i somo s jednon rukon. Ala, sal ti!“
Ćapa ti on ocu za vrot, drži mi je a jo gren provat must. Se ti jo na parićoni moli bančić, uze sićic u ruku, namisti se iza oce, podloži nu sićic pod vime. U livu ruku livu ikru a u desnu desnu. Provojen ali ne gre. Ako čo mlika i štrapne, to bude vonka sićica. Ćutin ništo mokro po nogon, lipive nogavice. Mlika svuda somo ne u sićic.
„Ne gre mi. Provoj Ivica ti!“
Zaminuli ti mi mista. Sal jo držin ocu, a on čučnu, muze. Dvi, tri kapje iz live ikre, dvi, tri iz desne. Nimo mlika. Ili san jo izmuza. „ Doj drugu!“
Pokože ti on meni drugu. „ Evo vako, provoj sa jednon rukon.“
Noge mokre, čelo potno, neka je tek 13. vejače, dobro se spominjen, bi je prvindon. On je drži za vrot, jo se na bančić, sićic pod vime, i gren jo provat must sa jednon rukon. Sa livon držin vime, sa desnon muzen. Ne mogu se načudit. Mliko gre i to gre dobota sve u sićic. Ali prsti me već bolu. Nison van ni reka, muza san somo sa dvo prsta. Onda se pribocin, desnu ruku na livu ikru.
Kad san je pomuza onda san do Meštru da obojde. Pošćuko je još bokun iz live, bokun iz desne. „Dobro je, ova je gotova. Sad ćemo drugu.“
Da van skrotin priču jer to je duralo, neka hi je bilo somo devet izaberenih.
„ Sutra ćeš ti to lipo som“ govori ti meni Ivica, a sigur san da se u sebi smijo „da mi te doć ujutro vidit“. „Fola ti . Dobra ti noć.“
Gren put doma sa sićon od 18 litor u ruku a u njemu pokriveno dno. Doma na pašabrod kus tula, procidi u lonac, poklopi i sa njin u frižider.
„Bože, kad ću ga napunit?“
Prid menon je još jedna noć bez sna. Navi san mobitel ujutro rano. Pri nego se rasvanulo jo san bi u štalu. Doni san ferol, obisi ga na gredu. Srića da su oce sinjone. Na jednoj gredi san noša brokvu, no nje zadi kus kartuna, parićo lopiš. Sada ruke na muke. Trčen po štali za ocon, štala velo, ovoc malo, izludile se uškuro, jedva san jednu ćapo. Dovuka je jo do kašete, turnu na silu unutra, ćapo za glovu, želin nu pročitat broj na uho. Ferol daleko, ne vidin, pustin je. Primisti ferol na drugu brokvu, blizu kašete i isponova.
Ni za provjat atroke za se folit koliko je to duralo. Pročitat broj na uho, uzest lopiš i zapisa ga na kartun, da ne bi koju iša must dvo puta.
Prvo oca. Čeću van provjat.
„Je meni ovo bilo potriba? Ali kako ću sad odustat? To če će se Ivica sprdot, to bi i prigriza, ali obećo san som sebi radi tate. Neću se pridat“.
Prvo je oca hiznula nogon, iskrenula sićic ali prozan. Muči san se, pati, ali nikako je išlo. Znalo je štrapnut mliko po klehu, po nogon, ali malo po malo, hodilo je. Postalo mi je nojgore lovit oce po veloj štali, tirovat hi u kašetu. Bolilo me sve. Zadubjen lavuron nison se ni ošervo da je zora odovna svanula, sunce se već visoko išalo. Srom me je pogledot koja je ura. Somo da me nikor ne vidi. Sić na brokvu, oce u pašu. Ti bi da do večeras čogod prigrizu da bi mogle nabrizgot do noći.
Proša je prvi don. Bokun pri noći gren dognat oce u štalu. Tresen se od muke, već znon če me sve čeko, ali moron. Ponovije se , ferol, brokva, korta, drugo brokva, sić na brokvu, sićic u ponaru, konovaca priko grede, oca u kašetu. Trč za ćapat jednu, po za drugon, po ćapon krivu. Muzen, šćukon, bolu prsti, ukočila se škina, prisopilo me. Dignen se na noge, držin se za škinu, a onda mi pode ništo napamet, počnen se naglos smijat.
„ Znote ono kad je jedon prvi put iša pomust kravu. Kako mu se ni dola pomust vezo nu je jednin konopon jednu nogu a sa drugin drugu. Dok je muza, dokli je sedi na bančić, krava ga je lanćala poserenin repon. Onda se on diga da će nu vezat rep za gredu. Kako već ni imo konopa skalo je kaiš za nu veza rep. Ali kako je skalo kaiš ispale su mu gaće, a jušto u to doba doša susid na vrota od štale. Pito ga da če čini, a on mu govori „ da prostiš, je... kravu“.
Pučen naglos od smiha, ovca isprid mene u kašetu, jo se držin za ukočenu škinu a Ivica na vrota od štale. Pošpikivac, svo vrime me je pono kroz ponaru.
„Brate, nison virovo da nećeš odustat.“
Josip Jakšić - Dračevica